Şəki yaylası faciəsində şok detal ortaya çıxdı

İlkinxeber.az informasiya agentliyi məlumat verir ki, Şəki yaylasında baş verən faciə ilə bağlı araşdırmada yeni iddialar ortaya çıxıb.
Müraciətdə qeyd olunur ki, prokurorluğun materiallarında kustar üsulla hazırlanmış və lentdən qopmuş əyləc mexanizmi “əlavə qoruyucunun zədələnməsi” kimi göstərilib.
Bu məlumat öz təsdiqini taparsa, əyləc mexanizminin hansı əsasla “əlavə qoruyucu” kimi qiymətləndirilməsi ilə bağlı suallar yaranır.
İddialara görə, əlavə qoruyucu sistemin əsas məqsədi rolikdə nasazlıq yarandığı zaman insanın trosdan asılı vəziyyətdə qalmasını təmin etməkdir. Belə sistemin quraşdırılması isə istehsalçının təlimatlarında konkret şəkildə nəzərdə tutulur.
Hadisə ilə bağlı daha bir sıra suallar da gündəmə gəlir. Əlavə qoruyucu kəmər niyə düzgün quraşdırılmayıb? Bu qurğunu kim hazırlayıb və quraşdırıb? İstehsalçının təlimatından niyə kənara çıxılıb? Eyni sistem digər avadanlıqlarda da tətbiq edilibsə, buna kim nəzarət edib?
Təqdim olunan görüntülərin digər avadanlıqlarda da analoji quraşdırmanın olduğunu göstərməsi halında, araşdırmanın daha geniş çərçivədə aparılmasına ehtiyac yarana bilər.
Bütün bu suallar cavablandırılmadan hadisənin yalnız “texniki nasazlıq” kimi qiymətləndirilməsi faciənin mümkün səbəblərinin digər istiqamətlərinin diqqətdən kənarda qalmasına səbəb ola bilər.