İlkinxeber.az informasiya agentliyi məlumat verir ki, Azərbaycan millisinin və “Qarabağ”ın sabiq kapitanı Maksim Medvedev “Sabah”ın UEFA Çempionlar Liqasının əsas mərhələsinin III turunda Dortmund “Borussiya”sı ilə keçirəcəyi qarşılaşma barədə fikirlərini bölüşüb.
O, “Report”a açıqlamasında “Sabah”ın son oyunlarda nümayiş etdirdiyi futbolun komandanın güclü rəqiblərlə mübarizə aparmaq potensialını göstərdiyini bildirib.
M.Medvedev qeyd edib ki, “Sabah” Azərbaycanı təmsil etdiyi üçün azarkeşlər komandanı dəstəkləyəcəklər. Onun sözlərinə görə, baş məşqçinin rəqibi ətraflı təhlil edərək xüsusi taktiki plan hazırladığına inanır. O, doğma azarkeşlər önündə oynamağın da komanda üçün üstünlük olduğunu vurğulayıb.
Sabiq müdafiəçi “Borussiya”nın əvvəlki illərlə müqayisədə fərqli heyətə və baş məşqçiyə malik olduğunu diqqətə çatdırıb. O bildirib ki, futbol və komandalar zamanla dəyişdiyindən əvvəlki qarşılaşmalarla indiki oyunu müqayisə etmək çətindir.
M.Medvedev “Sabah”ın xal qazanmaq imkanlarının olduğunu da deyib. O, komandanın son matçlarda baxımlı futbol sərgilədiyini, oyun tempini idarə edə bildiyini və taktiki gedişlərinin uğurlu alındığını bildirib. Sabiq futbolçu məşqçinin işinin aydın göründüyünü və heyətdə keyfiyyətli oyunçuların yer aldığını qeyd edərək “Sabah”ın yaxşı nəticə əldə edə biləcəyini vurğulayıb.
Qeyd edək ki, “Sabah” – Dortmund “Borussiya”sı qarşılaşmasının bu gün, saat 20:45-də Bakı Olimpiya Stadionunda keçirilməsi nəzərdə tutulub.
