Azərbaycanda aqrar sahədə qanunvericiliyin daha müasir tələblərə uyğunlaşdırılması və sistemləşdirilməsi istiqamətində yeni addımlar atılır. Bu məqsədlə kənd təsərrüfatı sektorunu əhatə edən vahid qanunun qəbul edilməsi nəzərdə tutulur.
İLKİNxeber.az informasiya agentliyinin məlumatına görə, bu barədə kənd təsərrüfatı naziri Məcnun Məmmədov Milli Məclisin Aqrar siyasət komitəsində keçirilən ictimai dinləmədə çıxışı zamanı danışıb. Müzakirələr “Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı”ndan irəli gələn vəzifələrə həsr olunub.
Nazirin sözlərinə görə, yeni qanunvericilik çərçivəsində kənd təsərrüfatı fəaliyyəti, kənd təsərrüfatı məhsulu və istehsalçı anlayışları vahid hüquqi sənəddə təsbit ediləcək. Bununla yanaşı, aqrar xidmətlərin təşkili və dövlət dəstəyi mexanizmlərinin hüquqi bazası formalaşdırılacaq.
İLKİNxeber.az informasiya agentliyinin əldə etdiyi məlumata əsasən, qanunvericilikdə iqlim dəyişiklikləri, kənd yerlərinin inkişafı və dayanıqlı istehsal kimi müasir yanaşmalara da geniş yer veriləcək. Eyni zamanda, balıqçılıq və akvakultura sahəsində uzun illərdir qüvvədə olan qanunların yenilənməsi planlaşdırılır.
Yeni “Balıqçılıq haqqında” qanunun qəbulundan sonra elektron xidmətlərin genişləndirilməsi, qeydiyyat və uçot sisteminin sadələşdirilməsi, idarəetmənin təkmilləşdirilməsi nəzərdə tutulur. Həmçinin bioloji su ehtiyatlarının qorunması və qanunsuz ovçuluğa qarşı mübarizənin gücləndirilməsi əsas prioritetlərdən olacaq.
Nazir bildirib ki, toxumçuluq sahəsində də mühüm dəyişikliklər gözlənilir. “Toxumçuluq haqqında” qanunun beynəlxalq standartlara uyğun şəkildə yenidən hazırlanması planlaşdırılır. Yeni qaydalar sertifikatlaşdırma sisteminin təkmilləşdirilməsini, elektron xidmətlərin artırılmasını və özəl sektorun elit toxum istehsalında iştirakını təşviq edəcək.
Dövlət Proqramında torpaq ehtiyatlarından səmərəli istifadə məsələsi də xüsusi yer tutur. Bu istiqamətdə kənd təsərrüfatı təyinatlı torpaqların parçalanmasının qarşısının alınması, torpaq konsolidasiyası mexanizmlərinin tətbiqi və torpaqların daha məhsuldar istifadəsinin təmin olunması nəzərdə tutulur.
İLKİNxeber.az informasiya agentliyinin məlumatına görə, fermerlərin maliyyə resurslarına çıxışını asanlaşdırmaq məqsədilə “Məhsul şəhadətnaməsi haqqında” yeni qanunun qəbulu da planlaşdırılır. Bu mexanizm kənd təsərrüfatı məhsullarının girov kimi istifadə edilməsinə şərait yaradacaq və fermerlərin dövriyyə vəsaitlərinə çıxış imkanlarını genişləndirəcək.
Məcnun Məmmədov vurğulayıb ki, həyata keçiriləcək normativ hüquqi islahatlar aqrar sektorun rəqabət qabiliyyətinin artırılmasına, investisiya mühitinin yaxşılaşdırılmasına və kənd təsərrüfatının müasir çağırışlara uyğun inkişafına mühüm töhfə verəcək.
