İlkinxeber.az informasiya agentliyi məlumat verir ki, Abşeron Rayon Polis İdarəsinin Dövlət Yol Polisi Şöbəsinin əməkdaşları tərəfindən keçirilən növbəti profilaktik tədbirlər zamanı yol hərəkəti qaydalarını kobud şəkildə pozan 122 motosiklet sürücüsü saxlanılıb.
Bildirilib ki, saxlanılanlar arasında sakinlərin rahatlığını pozan, yüksək səs effekti yaradan, eləcə də sürücülük hüququ olmadan nəqliyyat vasitəsini idarə edən şəxslər üstünlük təşkil edib.
Keçirilən tədbirlər zamanı nəqliyyat vasitələrinin konstruksiyasına qanunsuz müdaxilə edərək əlavə işıq və səsboğucu qurğular quraşdıran 30, yükdaşıma qaydalarını pozan 11, piyadalara müəyyən edilmiş keçidlərdə yol verməyən 18 və sərxoş vəziyyətdə avtomobil idarə edən 6 sürücü barəsində də inzibati protokollar tərtib olunub.
Qeyd edilib ki, Abşeron rayonu ərazisində yol hərəkəti təhlükəsizliyinin təmin olunması məqsədilə bu istiqamətdə profilaktik tədbirlər davam etdirilir. Sürücülərə və digər hərəkət iştirakçılarına yol hərəkəti qaydalarına ciddi əməl etmələri tövsiyə olunur.
