Azərbaycanda yaşayış və qeyri-yaşayış obyektləri üçün parklanma yerlərinin minimal sayına dair yeni məcburi kvotalar təsdiq olunub.
İlkinxeber.az informasiya agentliyi məlumat verir ki, bununla bağlı müvafiq qərar imzalanıb.
Yeni qaydalara əsasən, tikinti obyektləri üzrə parklanma yerlərinin sayı əhalisi 50 min nəfərədək olan yaşayış məntəqələrində 50%, 50–100 min nəfər arası olan məntəqələrdə isə 25% azaldıla bilər. Qeyd edək ki, bu kvotalar kənd yaşayış məntəqələrinə (Abşeron rayonunun kəndləri istisna olmaqla) şamil edilmir.
Sənədə əsasən, tikinti obyektlərinə aid parklanma yerləri yalnız həmin obyektin istifadəçiləri üçün nəzərdə tutulur və başqa məqsədlər üçün istifadəsinə icazə verilmir.
Çoxmənzilli yaşayış binalarında yeraltı parklanma yerlərinin sayı ümumi yerlərin ən azı 50%-ni təşkil etməlidir. Eyni zamanda, tikinti obyektləri metro, tramvay və ya dəmiryol stansiyalarına 400 metr məsafədə yerləşdikdə (yaşayış binaları istisna olmaqla), parklanma yerlərinin 30%-ə qədər azaldılmasına icazə verilir.
Yeni tələblərə görə, parklanma yerlərinin sayı 50 və daha çox olan obyektlərdə ən azı 5% elektrik avtomobilləri üçün enerji doldurma məntəqələri ayrılmalıdır. Bu yerlərdə digər nəqliyyat vasitələrinin saxlanılması qadağandır.
Minik avtomobilləri üçün bir parklanma yerinin minimal ölçüsü 2.3 metr en və 5 metr uzunluq olaraq müəyyən edilib. Avtobuslar üçün isə bu göstəricilər minimum 3 metr en və 8.5 metr uzunluq təşkil etməlidir.
Bundan əlavə, müxtəlif obyektlər üzrə parklanma normaları da təsdiqlənib. Belə ki:
Çoxmənzilli binalarda hər mənzil üçün 1 yer, 180 kv.m-dən böyük mənzillər üçün isə 1.3 yer ayrılmalıdır;
Fərdi yaşayış evləri üçün hər evə 1 yer nəzərdə tutulur;
Dövlət qurumları üçün hər 75 kv.m sahəyə 1 yer;
Xəstəxanalar üçün hər 5 çarpayıya 1 yer;
Restoranlar üçün hər 50 kv.m sahəyə 1 yer;
Şadlıq sarayları üçün hər 30 kv.m sahəyə 1 yer;
Stadionlar üçün hər 20 tamaşaçı yerinə 1 parklanma yeri ayrılmalıdır.
Həmçinin çimərliklər və parklar üçün hər 100 ziyarətçiyə 15 parklanma yeri nəzərdə tutulur.
Qərara əsasən, tikinti obyektinin təyinatı dəyişdirildikdə, yeni təyinat üzrə parklanma yerlərinin sayı da müəyyən olunmuş normalara uyğunlaşdırılmalıdır.
