Ermənistan Konstitusiyasında Azərbaycana və Türkiyəyə qarşı ərazi iddialarını ehtiva edən maddə aradan qaldırılmalıdır.
İlkinxeber.az informasiya agentliyi məlumat verir ki, bu fikirləri Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Türkiyənin “Haber Global” televiziya kanalına müsahibəsində səsləndirib.
Onun sözlərinə görə, bu istiqamətdə daxil olan siqnallar göstərir ki, Ermənistanda yeni konstitusiyanın qəbulu prosesi başlamaqdadır. Hacıyev qeyd edib ki, ərazi iddiaları konstitusiyadan çıxarıldıqdan sonra Azərbaycan yekun sülh sazişinin imzalanması üçün hər hansı maneə görmür.
O, həmçinin vurğulayıb ki, hazırda bölgədə faktiki olaraq de-fakto sülh vəziyyəti mövcuddur.
Prezidentin köməkçisi açıqlamasında Azərbaycan-Türkiyə münasibətlərinə də toxunaraq bildirib ki, hər iki ölkə bir-birinin maraqlarını daim qoruyur və qarşılıqlı dəstək nümayiş etdirir. Onun sözlərinə görə, tərəflərin maraqlarına zidd olan istənilən addıma qəti cavab verilir və bu prinsip bundan sonra da davam etdiriləcək.
