“Elmlər Akademiyası” və “Nizami”dən “Həzi Aslanov” istiqamətinə yeni ekspres marşrut
ilkinxeber.az informasiya agentliyi xəbər verir ki, Bakı metrosunda xətlərin ayrılması ilə əlaqədar sərnişinlərin ictimai nəqliyyata çıxış imkanlarının yaxşılaşdırılması məqsədilə yeni ekspres marşrut təşkil olunub.
Azərbaycan Yerüstü Nəqliyyat Agentliyinin (AYNA) məlumatına görə, artan sərnişin tələbatının qarşılanması məqsədilə sentyabrın 13-dən M9 nömrəli ekspres marşrut xətti fəaliyyət göstərəcək.
Marşrut metronun “Elmlər Akademiyası” və “Nizami” stansiyalarından “Qara Qarayev”, “Neftçilər”, “Xalqlar Dostluğu”, “Əhmədli” və “Həzi Aslanov” stansiyaları istiqamətində sərnişin daşınmasını təmin edəcək.
M9 marşrutunun “Elmlər Akademiyası” stansiyasındakı dayanacağı Hüseyn Cavid prospektində, “Həzi Aslanov” stansiyasındakı dayanacağı isə Məhəmməd Hadi küçəsində, metronun qarşısında yerləşəcək.
Ekspres avtobusların hərəkət qrafiki metronun iş rejiminə uyğunlaşdırılıb. Marşrut üzrə avtobuslar hər gün saat 06:00-dan 00:00-dək fəaliyyət göstərəcək.
