Hazırda Xankəndi şəhərində 28 mindən çox insan yaşayır.
ilkinxeber.az informasiya agentliyi xəbər verir ki, bunu Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov diplomatik korpus nümayəndələri ilə keçirilən görüşdə deyib.
Elçin Yusubov bildirib ki, şəhərdə dövlət və özəl sektorda çalışan şəxslərlə yanaşı, tələbələr və “Böyük Qayıdış” proqramı çərçivəsində doğma yurdlarına mərhələli şəkildə qayıdan ailələr də yaşayır.
Xüsusi nümayəndənin sözlərinə görə, Xankəndi şəhərinin və Kərkicahan qəsəbəsinin sakinlərinin öz doğma torpaqlarına qayıdışı davam edir. Kərkicahanda yaşayış evlərinin bərpası ilə yanaşı, Xankəndidə yeni yollar salınır, binalar yenidən qurulur və müasir infrastruktur yaradılır.
Hazırda Xankəndidə 3 mindən çox tələbənin təhsil aldığı bildirilib. Elçin Yusubov qeyd edib ki, tələbələr şəhər əhalisinin təxminən 10 faizini təşkil edir.
Bildirilib ki, şəhərdə həyata keçirilən bütün layihələr Xankəndinin Baş Planına uyğun reallaşdırılır. Ümumi memarlıq görünüşünə uyğun olmayan tikililər sökülür, onların yerində müasir standartlara cavab verən yeni binalar və ictimai obyektlər inşa olunur.
Elçin Yusubov şəhərdə bir sıra iri layihələrin həyata keçirildiyini də vurğulayıb. Görülən işlər nəticəsində Xankəndinin infrastrukturu yenilənir, yeni yaşayış və ictimai məkanlar yaradılır.
Aparılan genişmiqyaslı bərpa və quruculuq işlərinin şəhərin simasını dəyişdirdiyi, Xankəndinin yeni inkişaf mərhələsinə qədəm qoyduğu qeyd olunub.
