İlkinxeber.az informasiya agentliyi məlumat verir ki, Azərbaycan Xarici İşlər Nazirliyi vətəndaşlara silahlı münaqişə bölgələrində və yüksək riskli ərazilərdə işləməkdən çəkinmələri ilə bağlı növbəti dəfə çağırış edib.
Bildirilib ki, dəfələrlə edilən xəbərdarlıqlara baxmayaraq, bəzi Azərbaycan vətəndaşlarının bu cür təhlükəli zonalarda fəaliyyət göstərməsi davam edir. Nəticədə onların həlak olması və ya müxtəlif dərəcəli bədən xəsarətləri alması halları qeydə alınır.
Qeyd olunub ki, xüsusilə Qara dəniz hövzəsində davam edən hərbi əməliyyatlar fonunda mülki gəmiçiliyə qarşı ciddi təhlükələr mövcuddur. Pilotsuz uçuş aparatları, raketlər və digər silahların tətbiqi regionda təhlükəsizlik vəziyyətini son dərəcə həssas edib.
XİN vətəndaşlara təhlükəsizliklərini qorumaq üçün bu cür riskli ərazilərdən uzaq durmağı tövsiyə edir.
